Muzkur mendia

Muzkur muinoa dugu Aralarreko Mailoen azken gaina. Erpin geodesikorik ez balu, mendizale gehienen oharkabean pasatuko zen mendia da, baina horrek eta mendien zerrendetan agertzeak ibilbide atsegin baterako aitzakia emanen digu. Txangoa gertuko beste hainbat mendixka bisitatzeko balia dezakegu, hala nola Erbitz-Espartazabal, Zamariborro, Pastarri, Izarrite, Kaxamon... Gain gehienak basoan eta karst deserosoek defendaturik daude, baina pagadi ederrean barrena ibiltzeak deserosotasun guztiak ahanztaraziko dizkigu.