Etumeta aldetik hasi eta Arauntzaraino luzatzen den bizkar luzeko gain altuena da Sañoarena, baina gorabehera gutxiko gandor zabala da eta erraz zeharkatu daiteke dena, batzuetan pinudian eta bestetan larrean barrena. Tontorra bera baino leku aproposagoa da ordea Arauntzarena, metro bakar batzuk beherago ekialdeko muturrean, buzoi eta guzti, ikuspegi zabala eskaintzen baitu Azpeitia eta Izarraitzen gainean. Ohiko igoerabidea Azpetitik abiatzen bada ere, bada beste zenbait aukera, Lasao aldetik esaterako, pinudian barrena, edo Etumeta aldetik, hegi luzearen bizkarrari jarraituz.
Ibilbidea luzatzeko urrutitxo gelditzen dira zerrendako inguruko mendiak, baina sasoi onean egonez gero, Lasaotik abiatu eta Sañoara igo ondoren, Etumetara joan eta Santangrazi harrapatu daiteke, Aizarnara jaitsi gero eta Ertxiña igo, 5/6 orduren buruan Lasaora itzultzeko.