Altuera beretsuko bi gainek osatzen dute mendi hau, baina ez dago bien artean gorabehera handirik. HEkoa da buzoiduna, baina tontorrean jarritakoa falta da (2006/8/19). Bada inguruan beste bat, harri batetan sartuta. IEko isurialdea aldapa gutxikoa da gainaldean, eta pago, larre, ipuru eta karaitzak osatutako paisaia ederra erakusten du. HMko isurialdea berriz aldapa handikoa da, basoak estaltzen du ia erabat eta itxura ikusgarria duten haitz handi batzuk dira ibiltariaren arreta gehien erakartzen dutenak. Biderik erabiliena Irantzuko monastegirik abiatzen dena izango da seguraski, eta bada alde hartan zer ikusia: monastegia bera eta Irantzuko arroila, esaterako, urak haitzartean zabaldutako pasabidea. Neke handirik gabe luzatu daiteke ibilaldia IMan nabari den hurrengo muinora, Larraiza izenekora, ezpelez atondutako larreetan barrena, eta baita Iparralderago dagoen Kerezmendira ere, zailtasun gehiagorekin (ikus dagokion orria).