Pinudiak hartuta dago gehien gehienean, baina ikuspegi zabala du tontorretik Hernani aldera. Tontorra bi muinotan banatuta dago, bata ekialdekoa (548 m), harritsua, hiru buzoirekin eta mendebaldekoa bestea (547 m), otez josia bestea, harrizko oroigarri batekin.

Historiaurreko hainbat aztarnategi aurki daiteke bere inguruan. Aipamen berezia merezi du Mulisko Gaña izenekoak, izan ere oso eremu txikian bildutako hainbat monumentuz osatutako multzo ikusgarria osatzen du. Mulisko Gañera heltzeko bide aproposena Bisisarobe aldetik abiatzen da, pinudian barrena doan pista zabal bat, Oindiko suebaki nagusiko aldaparen hasieran eskubi aldetik bereizten dena.

Ibilbidea luzatzeko Aballarri aldera jo dezakezue, Adarraraino nahi izanez gero. Adarrara jotzeko bezala, Urnieta aldeko Besabi edo Besadegi sagardotegia da abiapunturik erabiliena.