Urtarai Lindusen anaia gaztea da. Burdinkurutxeta lepoak bereizita, bi mendiok ezaugarri anitz partekatzen dituzte: itxura leun borobilekoak dira, paisaia zabalak ikus daitezke beren gailurretatik eta iparrerantz luzatzen diren mendikate batzuen abiapuntu dira biok ala biok.
Adartzan amaitzen den kate ezaguna Lindusen hasten den bitartean, Urtaraik Otsamunho-Otsatxar mendietan burutzen den lerro apalagoari ematen dio hasiera.
Ibañetatik igotzen denak Lindusen batera joan liteke Urtaraira txango labur batean. Luzeago eta neketsuagoa (baina seguruenik ederragoa) izanen da Urepeletiko igoera, bide zaharrean barrena... edo Burdinkurutxeta lepotik igarotzen den pista asfaltatuan gora.