Auza erraldoia eta Izpegiko mendatearen arteko mendikatetxo laburrak (Usatxarreta eta Olate gainak dira gain nagusiak) adar motz baina interesgarri bat luzatzen du Aldudeko ibarrarerantz.
Bi lepo garrantzitsuk zaintzen dute kate horren hasiera: Nekaitz eta Elorrieta, non monumentu megalitiko ugari aurki baititzakegu.
Mendikate honen gain nagusia Elorriko Kaskoa dugu. Ekialderago, Urrizpilota mendia eta askoz beherago, dagoeneko Baigorri gainean, bizkarra Trenpeta muinoan amaitzen da.
Ibilbide laburrena Izpegi mendatetik abiatzen da, Nekaitzko sankan estua inguratzen duen bide markatu eta ederra segituz. Bideak Nekaitzko lepo zabaldean jarriko gaitu, Olateko gain malkartsua igotzeko aukerarekin. Handik aurrerakoa gainez gain ibiltzea besterik ez da izanen. Itzultzeko, mendikatea iparraldetik inguratzen duen bidea erabil genezake.
Ibilbide nekagarriago bat Baigorrin hasten da, Trenpetako gaina igotzen du lehenik... eta txirrindulaz ibili nahi dutenentzako aukera bat ere badago, errepidetxo bat iristen baita Urrizpilota eta Elortaren arteko lepora.