Iparraldetik hasita, Abartan dugu Baztango lurretan hasi eta ia Iruñeraino iristen den mendilerro luzearen lehen mendi garrantzitsua. Hala ere, erraldoi honetaraino iritsi aurretik, kate honetan hainbat gain interesgarri aurki ditzakegu. Ziga herriaren gainean, Ezkorlako Kaskoko bizkar leuna, Sorota trikuharriaren begiradapean. Baraburuko bizkar luzeak Aizkoako gailur konikora eramanen gaitu. Elorregiko lepotik Urdintz eta Urlegiko gainetara eramanen gaitu, bidean hainbat megalito eder aurkituz, Urdintzeko zutarri erraldoia eta Izkoako harrespilak, besteak beste.