Gorobel mendikatearen oinean, altuera apaleko mendixka batzuk daude hego-eki ipar-mendebal norabidean lerrokatuta. Hauetako bat da Babio. Iparraldeko eta ekialdeko aurpegiak aldapatsuak ditu, tontorretik gertu malkartsuak. Hego-mendebalderantz aldiz malda leun bat du.

Mendiaren formak eskaintzen zuen berezko babesaz baliatzen zen herrixka bat izan zen tontorraren inguruan Burdin Aroan. Herrixka hego-mendebaldetik babesten zuten bi harresiren aztarnak nabarmen ikus daitezke oraindik ere.

Tontorrera iristeko aukera batzuk daude, baina denak hego-mendebaldeko magaletik igotzen dira, Izoria, Mendeika, zein Belandiatik abiatuta. Bide garbiak eta leunak dira, orokorrean.

Txartelontzi bitxi bat du Babiok: burdinazko piezekin egindako mendizale baten eskultura. Tontorrak Aiara bailararen eta Amurrioren ikuspegi ederra eskaintzen du.