Ezkaurretxikia

Tamainak, batzuetan, garrantzia dauka. Ezkaurreko mendilerroa luze eta zabala izan arren, mendizale gehienek ekialdeko gailurra besterik ez dute ezagutzen, horixe baita 2000 metroak gainditzen dituen bakarra. Gailur nagusi hau interesgarria izanik ere, lau eta gazgabe agertzen da mendilerroko beste tontorren aldean: Baines eta Ezkaurretxikia.
Ezkaurretxikia mendilerroko mendebaldeko muturrean gailentzen da, amildegi zorabiagarriak eskainiz Izabaren gainean. Bere tontor bikoitzak eite bakarti eta basatia dauka. Hala ere, inguru latz honetan fauna oso aberatsa aurki dezakegu, ugaztunak eta hegazti harrapariak batez ere. Bideak bakanak dira eta gailur honek arreta eta eskarmentua eskatzen du, batez ere harria nagusitzen denean.