Igo beharreko mendia da Ireber eta ezagutu beharrekoa bere ingurunea ere. Hango baso, larre eta tontor harritsuek paisaia ederra osatzen dute, garbia, ibiltzeko aproposa, Aralar gogorarazten duena. Ireberrena paisaia horren erdian harrotutako bizkar harritsu eta soil bat baino ez da. Aldamenean zabaltzen den Arnaizuren gain borobila altuera berekoa da eta baditu harri eta lurrez osatutako 5 munto gorri larrearen erdian erraz nabarmentzen direnak. Ibilbidea luzatzeko aukerak ugariak dira: Zuperrori Iparraldean, Otsolako bailara bakartia eta Begaña Ekialdean, Aiztondo Hegoaldean, Seanbe HEan...