Jara

Bi Errobi ibaiek bat egiten dute Eihartzen, Jara mendiaren iparrean. Hau dugu beraz Errobi ibaien arteko mendikate luzearen azken mendia, beste gainetatik Irulegiko atakak bereizita. Inguruko mendien antzera, (Larla, Arradoi, Baigura...) Jara ederki bakarturik dago. Mendiak Baigorri eta Donibane Garaziren aldera luzatzen ditu bere hegi piku belartsuak. Iparraldean, berriz, erliebea harrotu eta gandor ikusgarriak altxatzen dira Arrosa aldera.
Jarako gailurrean antena bilduma handia dago, baita haraino daraman errepidexka ere, eta horrek guztiak apur bat itsusten du gainerakoan mendi ederra den hau.
Irulegitik igo daiteke mendi hau, baina azken txanpan errepidearekin eginen dugu topo. Beraz, ederragoa izanen da Eihartze aldetik abiatu eta Iko gandorrean gora egitea. Uspila bordaren bidea hartu eta Pagargietako baserrietara bideari segitu gandorra iritsi arte.