Bernoako itzulia ibilbidea

PR-Gi 2001 (Napar Bideak) ibilbidea jarraitzen du tarte luze batean, Ataungo Kaxetako bidegurutzetik abiatuta Lizarrustiko aterpe eta mendatera arte. Tarte honetan bidezidorra arin xamarra da leku batzuetan eta komeni da GPSaren laguntza zalantzak argitzeko. Bidea bihurria ere bada tarte batzuetan, gora-beheratsua, eta pasarteren bat edo bestetan aldapa tenteak zeharkatzen ditu, sasiak estu hartzen du beste batzuetan.

Lizarrustitik aurrera bidea erosoa eta narbarmena da gehienean, mendi bizkar zabalari jarraitzen dio Gipuzkoa eta Nafarroa elkartzen dituen muga-lerrotik gehiegi aldendu gabe: hesiak, mugarriak eta GR-12aren arrasto zuri-gorriak izango ditugu bide erakusle. Pagadiaren mendean gelditzen da tarte hau, sasiak ez digu eragozpenik sortuko eta eguzkiak ere ez. Baina arreta pixka bat jarri beharko dugu Bernoako galtzadaren arrastoa topatzeko, galtzada zahar horren bidea jarraitu beharko baitugu abiapuntura itzultzeko. Bernoako trikuharriak berak jarriko digu jakinaren gainean galtzada bera ikusten ez badugu: bere inguruetan ikus daiteke galtzada, arlosa zabalekin osatutako ertzak ageri dira han-hemenka. PR-GI 2001 bidearen arrastoa ere bertan topatuko dugu berriz eta berak lagunduko digu galtzada zaharraren arrastoa jarraitzen (tarte askotan erabat deseginda dago).